كفى إستخفاف بعقول الغير

يوم 24 يناير 2011الساعه 11:59 مساءا لو إخترقت بيوت مصريه كتيييره كان ممكن تسمع الجمله دي من أب أو أم أو جد أو جده:
--"هنقول إيه ما أصل إنتوا جيل فاشل ولا هتنفعوا .. أنا وأنا قدك -بدأنا المقارنه- كنت زماني فاتح كتب و قاعد بقرأ فيها"
**طيب و ليه متفرضش إنه بيقرأ مقالات و لا بيشارك في صنع خبر على Twitter ولا حتى بيقرأ كتاب pdf ولا بيتناقش مع ناس في من تيارات مختلفه

 و على فكره هناك العديد و العديد من الروايات اللي بتتقال بعد جمله "أنا و أنا قدك" .. ده قبل 25 يناير 

يوم 11 فبراير 2011 بعد خطاب التنحي مباشرتا .. لو إخترقت نفس البيوت المصريه الكتيييييره أوي دي كان ممكن تسمع الجمله دي من شباب لأهليهم:

--"أهو إحنا الشباب اللي إتريقتوا علينا و قولتوا إننا جيل فاشل .. كان ممكن وأنتوا قدنا -وهنا بدأنا المقارنه تاني- تعملوا حاجه زي دي و في بس 18 يوم أسقطنا رئيس سكتوا عليه 30 سنه "

**طيب هما في وقتهم حاربوا إسرائيل و بدايه فساد مبارك كانت العشرين سنه الآخرنيين من حكمه و اللي هما عمر معظمنا .. و اللي كان مبارك في الوقت ده بدأ تنفيذ خطه "إلهاء الشعب المصري في لقمه عيشه" فكان أهلي و أهلك كل شغلهم الشاغل تأمين لقمه العيش و تربيتنا .. و أنا معاك إن مفيش حاجه كانت المفروض تلهي حد عن التعبير عن رأيه و المشاركه في قضايا مجتمعه بس ده اللي حصل !!

اللي أقصد أقوله .. أحنا عملنا ثوره و أسقطنا مبارك .. و الجيل اللي قبلنا عمل نصر 73 .. و اللي قبله عمل إنقلاب عسكري على النظام الملكي 

كل جيل فيه مزايا و عيوب .. و مش بس الجيل ده كل شخص كده .. ليه الكبير يبدأ في مقارنه لا تستند على أوجه مقارنه أساسا .. لا الزمان نفس الزمان ولا المكان نفس المكان .. ولا الثقافه العامه للمجتمع المحيط نفسها في عصرك !! 

بالتالي لا يوجد أي سبب للمقارنه سوى الإستخفاف بعقل إبنك و التسفيه منه- بحجه أنك بذلك تشحنه نفسيا كي يصبح أفضل أو مثلك بما إنك تقارنه بنفسك- تمام .. سؤال ليه عايزه زيك؟؟ لو أساسا ربنا عايزنا كلنا كربونه من بعض .. كان خلقنا كلنا نفس الشكل بنفس الطباع و في نفس العصر و نفس كل حاجه ؟؟ 

خلينا نبطل إستخفاف من الطرفين .. كل جيل بيثبت نفسه بطريقته و بالآليات المتاحه أمامه .. و قد أثبت جيلنا الجداره في ذلك كما أثبت جيل الكبار و لازال كل منّا يقدم .. كفانا مقارنات لن تعود على أي منا بفائده و دعنونا نعمل كفريق الكبار بالخبره و الرؤيه "القابله للمناقشه" و الأبناء بالحماس و القدره على تطبيق الأفكار الجيده بالآليات المتاحه بطريقه فعاله و كل ذلك بهدف رفعه مصر و تقدمها !

وآه كنت هنسى !! 

بمناسبه الخبره .. سؤال:ليه الآباء دايما بيقولوا "عمر ما خبرتك هتبقى زي خبرتي" .. بالتالي دائما آرائهم صحيحه ؟؟

هي إيه الخبره أساسا غير المعلومات اللي بيكتسبها الفرد خلال عمره و كل ما لاحظت أكتر فرصتك في الفوز تكتر .. إحم أقصد يبقى عنك خبره أكبر .. , و بالتالي بعض الملاحظات اللي تم ملاحظتها محدش عدّل عليها ف وارد تكون خبرات فيها الصح و فيها الغلط !!!
بالإضافه إلى أن العمر ثابت في المقارنه .. بالتالي لو عمرين مختلفين يعني تحول الثابت لمتغيير فلا تجوز المقارنه أساسا .. بالتلي ممكن بدل الجمله دي أن تُكسِبه من خبراتك و ناقشه فيها فلربما تكون مخطئ و لربما أقنعته برأيك !!

وصلت الفكره ؟؟

ممكن ميعجبكش رأيي .. و ممكن تقول دي قله إحترام مني ..

بس أنا هقولك ,أنا الكلام ده لا يمكن أقف في يوم من الأيام قدام أهلي عشان أقوله لأن عمري ما هتكلم مع أهلي و أنا حد غير أميره بنتهم 

أنما أنا دلوقتي واحده بتدون رأيها و هي واقفه ما بين إبن و أب و أم .. شخص إلى حد كبير محايد .. و بيكلم الكل على إنه هو الحكم 

أينعم لم ينصبني أحد لذلك ولكن أنا الحكم في زماني .. زمان الصمت !!
                                                          
                                                   أميره بركات