إحنا دوله وسطيه
إحنا دوله ديمقراطيه
كتر أوي لعبك معانا
يا رئاسه يا شقيه
نلعب صلح على قفانا
نلعب عسكر و حراميه
إحنا دوله وسطيه
إحنا دوله ديمقراطيه
حتى العيش مش مستوانا
الزلط ده علينا شويه
حتى السم في هوانا
و النيل مبقاش فيه ميّه
إحنا دوله وسطيه
إحنا دوله ديمقراطيه
و محدش من الضر حمانا
و معندناش زيت للقليه
و الموت بيشوفه ضنانا
بس الكلاب هي الوفيه
إحنا دوله وسطيه
إحنا دوله ديمقراطيه
كله كلام في الهجايص
بس احلنا عيشه هنيه
و الفقر و الغلب لايص
بعيون و قلوب راضيه
إحنا دوله وسطيه
إحنا دوله ديمقراطيه
يا رئاسه مدتك طالت
و إنتي على شعبك بغيه
و كفوف الناس ليكي مالت
أرحمي شعبك شويه
إحنا دوله وسطيه
إحنا دوله ديمقراطيه
ولا أقولك يا رئاسه
انا بحبك و أنتي عارفه
الحب ده بالوراثه
و من قلوب الشعب غارقه
يا رئاسه الجمهوريه
أنتي كلك إنسانيه
انتي مش المفتريه
ده أنتي صعبانه عليا
بكره هاجي ليكي بكره
و أستلم منك الهديه
ما أنا بمدح فيكي أهو
و لازم آخد جايزه ليا
مسكيني رئيس وزاره
أو محافظ اسكندريه
أو ممكن أدير بنوكك
و أحط في جيوبي المهيه
واحده واحده ياجماعه
أدواركم كلها جايه
و بعدين اللي بعدي يجي
يمدح في الحكومه شويه
و آخر كلمه هي ديه
يا رئاسه الجمهوريه
ألفين سلام ليكي و تحيه
No comments:
Post a Comment